सुभद्राहरणम् — अष्टादशस्सर्गः | subhadrāharaṇam — aṣṭādaśassargaḥ

छन्दः अधः चिनुत /

Last updated: 2026-11-13 15:30:41

॥ अथ अष्टादशस्सर्गः ॥

गतवतीन्द्रसुते तु तपस्सुतः
श्रुतपराशरसूनुसुभाषितः ।
शुचमपास्य ददद्धृदये धृतिं
वसुमतीमवति स्म सहाऽनुजैः ॥

जयवियोगजदुःखमहाभरं
सह कथञ्चिदमी दधतो नयन् ।
कृतगुणातिशयोत्तरतत्कथा-
कलकलध्वनयोदिवसाश्च तम् ॥

हलिहरी परिभूय भुजौजसा
तदनुजामपहृत्य च फल्गुनः ।
अयमुपैति तया सहितः पुरी-
मितिकथाऽथ कदाचिदगात्पुरम् ॥

श्रुतियुगं सुहृदामधिनोत्तदा
जयकथाजलजन्मरवो द्वयम् ।
नयनयुग्ममपि द्वयमुच्छ्रितं
पवनजं बलधूलिकपिध्वजौ ॥

अथ विचिन्त्य समं हरिणार्जुनो
द्रुपदजासदनं विनयानताम् ।
व्रजवधूसहितामनयद्वधूं
तदतिशोभनवेषविभूषिताम् ॥

सहजरूपविशेषविनम्रता-
हृतचराचरलोचनचेतना ।
व्रजवधूसहिता विजयप्रिया
सवनसेनभुवो भवनं ययौ ॥

व्रजवधूभिरमोपगतान्नतां
कलितबर्हकचां वनमालिनीम् ।
प्रकरणेन सुरूपतया च
तामतुलयाऽऽक्रलयद् द्रुपदात्मजा ॥

द्रुपदजाऽऽनक्रदुन्दुभिनन्दने
ददृशतुः कुतुकादितरेतरम् ।
प्रकटितश्रुतरूपविशेषया
स्फुटशरन्नलिनीसदृशा दृशा ॥

हलिगदाधरयोस्सदृशी वधू-
र्वदत केयमिति व्रजयोषितः ।
द्रुपदनन्दनयाऽभिहितास्तदा
शिरसि सङ्ग्रथिताञ्जलयोऽब्रुवन् ॥

सकलराजसहस्ररुचा हृता
सरदसंख्यगुना हरिसूनुना ।
अवरजा भगिनीयमवेयतां
हलधराच्युतयोरिव राजिते ॥

इति निशम्य वचो व्रजयोषितां
प्रमुदिता सुतरां द्रुपदात्मजा ।
घनतरस्तनरुद्धपयोधरा-
मसृसमासुसमां परिषस्वजे ॥

अभिदधौ च चिराय धनञ्जयं
सुदति तोषय स्वस्वजनं गुणैः ।
सकलहंसगणं कुसुमैः स्फुटै-
र्नवशरन्नलिनीव दिवाकरम् ॥

अथ पृथाभवनं प्रणिनाय तां
प्रमुदितप्रमदाजनसङ्कुलम् ।
कमलिनी कमलामिव पार्षतीं
सशफरीलसितं सरसीजलम् ॥

अथ निशम्य पृथा वसुदेवजां
भुजबलेन हतां विजयेन ताम् ।
तुलितसीरसुदर्शनहेतिना
स्मितमुखेन्दुरशोभत वीरसूः ॥

धवलवाहवधूमुखदर्शने
तुलितशारदपूर्णविधूदये ।
परिचचाल पृथास्मितफेनिला
जलनिधेरिव वीचिपरम्परा ॥

अथ पृथाचरणारुणपद्मयो-
र्द्वयमवन्दत दुश्च्यवनस्नुषा ।
निखिलवीरनरेन्द्रकुटुम्बिनी
नतिपतत्कबरीकुसुमार्चितम् ॥

सपदि सा समजिघ्रदजानुजां
कचभरेऽसितबर्हसितस्रजि ।
असिचदङ्गधृतामुपगूह्य च
क्षरतिचक्षुररोजपयः कणैः ॥

पृथुधियाऽपि मुहुः पृथया तदा
प्रथितनिष्णतयाऽपि च कृष्णया ।
स्खलितमाल्यकर्म सुशोभनः
प्रियजनागमने खलु संभ्रमः ॥

अविरताप्लवलेपनभूषण-
वसनविभ्रमणाकुलयौवतः ।
अदनतुन्दिलबालजरज्जनः
प्रववृतेऽथ पृथागृह उत्सवः ॥

अथ निशम्य तथागतमर्जुनं
समदनौ च हलायुधमाधवौ ।
नरपतिः प्रचचाल वरासना-
द्रुत इव प्रमदार्णववीचिभिः ॥

स निर्याच्चरया सवृकोदरः
सनकुलस्सहदेवयुतः पुरात् ।
जयबलाच्युतकामविलोकना-
कुतुकपूरितपौरजनावृतः ॥

उभयपार्श्वधृतामलचामरो
धृतसितातपवारणमस्तकः ।
मणिमयाखिलभूषणभासुरो
रथमलङ्कुरुते स्म युधिष्ठिरः ॥

सुचिरदृष्टमिवैक्षत तं तदा
सततदृष्टमपि क्षितिपं जनः ।
परिचये नवमेव हि कल्पते
मधुरवस्तु न जातु पुरातनम् ॥

रथपदाति तुरङ्गम तङ्गज-
व्यतिकरोत्थपराग तनुस्तदा ।
अजितमीक्षितुमुत्सुकमुन्मनाः
पतिमजं तमधावदिव क्षितिः ॥

अथ महीपति रेकरथे स्थितान्
बलमुकुन्दमनोजधनञ्जयान् ।
अलभत प्रमदाद्विलोकयन्
विपुलदीर्घविलोचनताफलम् ॥

हलिहरिप्रमुखाश्च पृथासुतं
दृष्टशुरस्तनिमेषविलोचनाः ।
क्षुभितसम्मददुग्धपयोनिधि-
ग्रथितफेननिभोल्लसितस्मिताः ॥

हलधरप्रमुखाश्चयुधिष्ठिर-
प्रभृतयश्च विलोक्य परस्परम् ।
युगपदेव रथादवनिं ययु-
र्ध्वनिभदाभरणाभिहता इव ॥

परतरौ पुरुषौ नरतां गतौ
सकलमानुषमस्तकनम्ययोः ।
हलिहरी नृपतेस्सुकृतात्मन-
श्चरणपङ्कजयोः प्रणिपेततुः ॥

स्वभुजयन्त्रनिरुद्धनती क्रमात्
सपदि तौ स यदा परिषस्वजे ।
पुलकवान् मुकुलायितलोचन-
श्चरणयोः स्म तदा नमतोऽस्य तौ ॥

पुलकितावयवः परिषस्वजे
बलबलावरजाववनीपतिः ।
मुकुलिताङ्गचयः कनकाचलो
हिमहरिन्मणिभूमिधराविव ॥

हलधराच्युतयोरुपगूहने
तदनुभूतिरसेन युधिष्ठिरः ।
तदभवन्नु तदङ्गसुधातसी-
कुसुमसोदरदीधितिरञ्जितः ॥

असदृशीन्नतिमाचरतो युवां
किमिति दासजनेन जगत्पती ।
क्षितिमितौ क्षितिभारजिहीर्षया
कलितकोमलमानुषविग्रहौ ॥

यदि मयि प्रणयः करुणाऽथवा
चरणभाजि पितृष्वसुरात्मजे ।
पदसरोजरजःपरमाणुभि-
श्छुरयतं प्रणतस्य शिरो मम ॥

इति वदन् वसुदेवकुमारयोः
प्रणिपपात पदाब्जचतुष्टये ।
प्रणयभङ्गभयस्तिमितो नृपो
नखरुचिच्छुरितांशुशिखामणिः ॥

अतिपवित्रमपि स्वत एव तौ
स्थितवतोऽवनिरेणुभृतः पुरः ।
नरपतेरपवित्रयतां वपु-
स्सकलपापहरैरुपगूहनैः ॥

घनभुजान्तरपीडितवल्लभ-
क्षितिरजःस्तनचन्दनधूसरम् ।
क्षितिभृतं कुपिताविव तौ तदा
भृशमपीडयतां धरणीधरौ ॥

नतपदं परिचुम्बितम-
स्तकं नरपतिस्तमित्थमथाब्रवीत् ।
गुह इव त्वमुमावृषभ-
ध्वजौ सुखय वत्स चिरं पितराविति ॥

श्रितपादमर्जुननवाम्बुधरं
स्मृतवानथ क्षितिभृदङ्कभुवा ।
बहुबाष्पमुच्छलनेत्रपयः
शिशिरं चिरस्य हरितं मिलितम् ॥

अमृतायमानतनुसंघटन-
द्रुतचित्तसिन्धुपरिवाहमिव ।
श्रमवारिशीकरचयं दधतः
प्रथमोच्चमावथ पृथातनयौ ॥

कनकावदातमरुणा-
ब्जदृशं पृथुबाहुमध्यमुरुदीर्घभुजम् ।
अवलोक्य तेन तद्वपु-
र्मदनं हरिरुक्मिणीहृदयवासगृहम् ॥

व्रतकर्शिताय परिपूजयते
मधुसूदनाय यमुमासहितः ।
करुणारसस्त्रपितरूढतनु-
र्विततार दग्धमपि सूनुमजः ॥

मुषितेन येन निजवल्लभया
परिवर्धितेन तरुणीभवता ।
किल शम्बरस्तदभिधाविदितं
विनिहत्य सा निजगृहे जगृहे ॥

कुपितेन येन तनुनिर्द्दहना-
दचलात्मजानयनभल्लशतैः ।
शकलीकृतेव निगमप्रथितां
बहुभेदतां वहसि रुद्रतनुः ॥

अतनूकृतस्त्रिणयनेन च यो
नयनाशुशुक्षणिशिखावलिभिः ।
अकरोदनर्घतनुमम्बिकया
तममर्षपूर्णहृदयो नियतम् ॥

बलिभीम्योरिव महाबलयो-
रभिरूपयोर्नकुलमन्मथयोः ।
परमाबबन्ध हृदयं प्रणयं
गुणतुल्यता हि हृदयं हरति ॥

बलकृष्णजिष्णुमदनास्त्वरितं
क्षितिपालभीमयमदत्तकराः ।
पतयो दिशामिव करम्बितदि-
क्पतिपाणयोऽथ रथमारुरुहुः ॥

स्वयमेव नेतुमथ रामकेशवौ
प्रणयी नृपः प्रवयणं समाददे ।
सहसा हसन्नपजहार तद्धरि-
र्धरणीपतिस्तमथ विष्वगैक्षत ॥

अपहृत्य भीमधृतमुष्णवारणं
नृपतेरुपर्युपरि मस्तकं दधौ ।
निजदेहकान्तिपरिपूर्णमण्डलं
मणिमौलिरश्मिशबलीकृतं बलः ॥

स्मयमानवक्त्रकमलस्मितोऽन्तरा
बलकृष्णधर्मपवमानजन्मनः ।
वलमानपाणिशतपत्रपेशलं
समवीजयद्विजय एव चामरम् ॥

कुसुमावलीसुरभिकेशकाननो
परिवर्तयन् युवजनस्य मानसम् ।
स्थितवानभादमरवैद्यनन्दनौ
मदनोऽन्तरेण मधुमाधवाविव ॥

लसदातपत्रसितफेनमण्डला
तुरगोर्मिभृद्धरिपदादुपेयुषी ।
अविशद्गभीरनिनदाऽथ वाहिनी
पुरगोपुरान्तरसुमेरुकन्दरम् ॥

अथ सौधमारुरुहुरात्तसंभ्रमाः
पुरयोषितस्सपदि सामिभूषिताः ।
बलकृष्णजिष्णुमदनावलोकना-
कुतुकस्फुटस्तिमितनेत्रकोटयः ॥

परिषिक्तमृष्टमणिमेदिनीतनुः
कुसुमोपहारपरिधानधारिणी ।
कुचचक्रवालनिभसौधमण्डला
व्यवहारतुल्यशुभतूर्यनिस्वना ॥

अथ सा विलोक्य सवधूजयश्रियं
नगरी चिरस्य सबलाच्युतस्मरम् ।
लसदुद्यतध्वजपटाग्रपाणिना
मुदिता समाह्वयदिवार्जुनं मुहुः ॥

स रथोऽधिरूढपुरुषोत्तमाष्टक-
स्सुपृथुः कथञ्चन हयैरनीयत ।
अधिराजवीथि भरभुग्नकन्धरै-
रतिदीर्घपौरनयनोत्सवप्रदैः ॥

युवलोकलोचनहरातिसुन्दर-
प्रतिभूषिताभरणगात्रयष्टयः ।
अधिरुह्य सौधशिखराणि सुभ्रुव-
स्तरसाऽथ वासवसुताय तस्थिरे ॥

धृतयावकद्रवनवांशुमत्प्रभै-
रतिलोहितद्युतिभिरङ्घ्रिपङ्कजैः ।
हिमबिन्दुसुन्दरनखाङ्गुलीदलै-
रतिमञ्जुशिञ्जितमनोज्ञहंसकैः ॥

अमलीमसैरधिकसूक्ष्मतान्वितैः
प्रकटीकृतोरुजघनोरुमण्डलैः ।
कृतसर्वलोकनयनप्रवृत्तिभि-
स्ततिमद्भिरम्बरमयैरिवाम्बरैः ॥

परमाणुभिस्तदपि कौतुकाचल-
स्फुटलोकलोचनशतावलोकितैः ।
वलिभङ्गुरै रुचिररोमराजितै-
रुदरैर्गभीरशुभनाभिमण्डलैः ॥

गुरुगैरिकप्रतिमकुङ्कुमारुणैः
शरदभ्रराजिनिभहारयष्टिभिः ।
कृतभूरिपुण्यजनतावलम्बितैः
पृथिवीधरैरिव कुचैः पृथून्नतैः ॥

व्यतिकीर्णरत्नवलयाङ्गदप्रभैः
स्मरचित्रकौसुमधनुर्धरैरिव ।
धृतिविभ्रमश्रमजलार्द्रचन्दनैः
कटिषु क्रमेण कृतविश्रमैर्भुजैः ॥

शितिपत्रभङ्गमृगशावकाङ्कितैः
स्मितचन्द्रिकाधवलगण्डमण्डलैः ।
श्रितहारयष्टिवलयोडुमण्डलैः
कबरीनिशामृतमरीचिमर्युखैः ॥

अतिसूक्ष्मवातचलिताधरांशुक-
क्षणदृष्टनष्टरुचिरोरुमण्डला ।
पुलकच्छुटोच्छ्वसितनीवितुल्यता-
करणक्कणत्कनकपाणिभूषणा ॥

स्फुरितान्तरालवलिनाभिमण्डला
प्रथमानपार्श्वभुजमूलविभ्रमा ।
कचबन्धनोन्नमितबाहुवल्लिका-
विवृताद्रपाणिजपदोन्नतस्तनी ॥

मृदुहासभासुरकपोलकुण्डला
विपुलायतेक्षणविलंबितश्रुतिः ।
बलकृष्णजिष्णुमदनेक्षणत्वरा-
धृतभूषणाऽपि विरराज काचन ॥

इह किं कुरङ्गनयना न कुर्वते
शिथिलत्वमप्युपगतेन काचन ।
रशनागुणेन सुदृढं बबन्ध यत्
सह मानसानि नयनानि कामिनाम् ॥

मणिपादभूषणमिवापदे दध-
त्सकलं प्रसाधनमदभ्रसम्भ्रमम् ।
स्वदिदृक्षया निकटवर्ति यौवतं
सदयं तदा नरवरैर्निरीक्षितम् ॥

रुचिपूर्णशुक्लशितिरक्तताप्रभा-
प्रतिपूर्णशुक्लशितिरक्तरश्मिभिः ।
नयनैस्तृपा परिपपुःप्रसारितै-
र्नगराबला बलवलानुजस्मरान् ॥

मखभुञ्मनुष्यपशुचित्तमोहनैः
सततं धृतैस्सुरभितादिभिशुभैः ।
तरुणीरविध्यदुपसृत्य चित्तभू-
रपरोक्ष एव विषयेषुभिस्तदा ॥

पुरयोषितः कुमुदषण्डपाण्डुरं
पुरतो विलोचनमरीचिसञ्चयम् ।
व्यकिरन्ननन्तशतपत्रनेत्रयो-
श्शयनाय सूनुमुदधिं पयोमयम् ॥

ददुरिन्दुकुन्दकुमुदोदरत्विषि
स्फुटितातसीकुसुमनीलवाससि ।
वनमालिनि स्फुरितबर्हशेखरे
नयनानि नीलनयना हलायुधे ॥

कुरुराजपत्तनकुरङ्गचक्षुषा-
मवगाह्य नेत्रशफरीपरम्परा ।
हलचक्रहेतितनुक्रान्तिजाह्नवी-
यमुनाजलव्यतिकरं व्यकुर्वत ॥

वनमालयोरसि शिखण्डमालया
शिरसि स्फुरत्करुणयाऽवलोकयन् ।
हरिरीक्षणानि हृदयानि चाहर-
द्दरिणीदृशां दुरितसन्ततीरपि ॥

सुदृशः श्रमाम्बुसरसीजलाप्लुताः
पुरुषं पुराणमपचिन्वते पुरा ।
पृथुलोचनाञ्जलिपुटापवर्जित-
द्युतिनीलरक्तसितपद्मपङ्क्तिभिः ॥

नवनीतदुग्धदधिगोपकन्यका-
वसनापहारमयरम्यशैशवः ।
स किलैति कृष्ण इति कीर्तितो विभुः
सुदतीः स्म लज्जयति सस्मितेक्षितैः ॥

स्फुटितातसीकुसुमनीलविग्रहं
कनकप्रभापटलपीतवाससम् ।
स्फुटिताब्जरागहरिनीलगुम्फित-
स्फुरदंशुशारकटीतुन्द्वन्धनम् ॥

अरुणाश्मरश्मिचितहेमनूपुर-
द्युतिमण्डलीशबलपादपङ्कजम् ।
समुदारशङ्खकिणरुग्मभूषण-
श्रितजान्वतीतभुजदण्डमण्डितम् ॥

स्मितधामधौतनवहारनायकी-
कृतकौस्तुभद्युतिचिताधरप्रभम् ।
मकराननश्रवणभूषणांशुम-
त्करभिन्नबाहुशिखराद्रिमस्तकम् ॥

तुलितेन्द्रनीलमणिदर्पणश्रियो-
र्दधतं द्वयं विमलयोः कपोलयोः ।
परिचुम्बदम्बुधिसुताधरप्रभा-
निभकर्णिकारुणमणिप्रभाक्तयोः ॥

अपनिद्रकोकनदकान्तलोचनं
ललितायतोन्नतनताग्रनासिकम् ।
दधतं दृगब्जमधुपाङ्गने भ्रुवौ
सुललाटिकाङ्कितललाटपट्टकम् ॥

कुटिलालिनीलकचबन्धनस्फुर-
द्वहुपुष्पकर्व्वरशिखण्डशेखरम् ।
अवलोक्य तं न ततृपुः पुराङ्गनाः
पुरुषं पुराणमपि पूर्णयौवनम् ॥

दुरितान्धकारनुदमंशुमालिनं
शिशिरद्युतिं शमिततापमच्युतम् ।
अरविन्दिनीकुमुदिनीवदङ्गनाः
प्रतिपद्य हर्षमतुलं प्रपेदिरे ॥

मृदुमारुतेरितदुकूलपल्लवाः
स्तनमण्डलस्तवकभारभङ्गुराः ।
चिकुरद्विरेफनिकुरुम्बचुम्बित-
स्मयमानवक्त्रसुमनोमनोहराः ॥

फलसंश्रयाय भवतोऽङ्गनालताः
दरधृतबाहुविटपाग्रपातितान् ।
शुभलाजपुष्पनिकरानवाकिरन्
बलकेशवार्जुनमनोजमूर्धसु ॥

परिभूषितानि रमणैर्यथापदं
करजैर्मयूरपदकादिभिः कृतैः ।
शिवलाजवर्षसमुदस्तदोर्लता-
स्तनमण्डलानि सुदृशोऽप्यवृण्वत ॥

हरिनीलशैलसमभासि चाऽच्युते
शुकमेचके च शतमन्युनन्दने ।
कनकोज्वले च मदने रराजिरे
न शशिप्रभे हलिनि लाजवृष्टयः ॥

नगरेन्दिराधवललोचनांशवः
पुरदेवताहसितदन्तरश्मयः ।
शिवसस्यबीजनिकराङ्कुरोद्गमां
क्षुभितोत्सवाम्बुनिधिफेनविन्दवः ॥

सुतवत्सलाम्बरगतावलोकयन्
बलसूदनेक्षणसहस्रभानवः ।
सदपत्यदर्शनरसादुपागताः
पितुरादिमस्य शशिनः परिग्रहाः ॥

कुसुमायिता शिरसि कान्तकुन्तलैः
कपिकेतुमापुरबलाचलाजकाः ।
अदयोपगूढविदलद्गुणच्युत-
स्तनकुम्भहारमणयो जयश्रियः ॥

अवलम्ब्य राममुरविद्विषोः करौ
रुरुचे रथादवतरन्युधिष्ठिरः ।
अथ पार्वतीरमणपद्मनाभयोः
खमहाविमानत इव प्रजापतिः ॥

प्रथमाश्विमन्मथकरावलम्बिना
द्विपतां बलं दिव इव स्थलं पुरा ।
कृतपाणिना नकुलरौक्मिणेययो-
स्तनयेन तस्य जुजुषे रथात्ततः ॥

सहधर्मराजमरुदश्विनन्दनः
सहरौहिणेयहरिरुक्मिणीसुतः ।
पुरुहूतसूनुरुपसेदिवानथ
प्रथमानमङ्गलशतं पृथागृहम् ॥

स्फुटपुण्डरीकविहिताननोल्लस-
त्कनकोदकुम्भशतशोभितं पुरम् ।
शुभपुष्पदामसितरत्नतोरण-
द्युतिपूरभास्वरसनीडभूतलम् ॥

बहुरोचनामलयजाम्बुश्रौतस-
न्मणिभूलसत्कनकभाण्डमण्डलम् ।
दधिशङ्खरुच्यसुफलाक्षतादिम-
द्धृतसर्वधान्यतपनीयभाजनम् ॥

परिक्लृप्यमानविविधप्रसाधनं
क्रियमाणसाधुगृहदेवतार्चनम् ।
परिपच्यमानहविरन्नसङ्कुलं
परितर्प्यमाणवसुधासुधाशनम् ॥

उपनीयमानशिववस्तुसञ्चयं
परिकीर्त्यमानबहुपुण्यकृज्जनम् ।
परिमृज्यमानपृथुरत्नदर्पणं
परिभूष्यमाणतरुणीपरम्परम् ॥

ससरोजषण्डमिव पाणिभिः पदैः
समहेन्दुवृन्दमिव सुन्दरैर्मुखैः ।
सरथावलीव जघनैर्नतभ्रुवां
ससुजातरम्भमिव पीवरोरुभिः ॥

रतिजीवितेशजयहस्तिमस्तकैः
स्तनशातकुम्भकलशैरलङ्कृतम् ।
स्मरपत्तनोपवनवल्लिभिः स्फुर-
त्सुतलप्रवालरुचिभिश्च बाहुभिः ॥

हरिचन्दनच्छुरितहारकन्धरै-
र्मणिकुण्डलोल्लसितगण्डमण्डलैः ।
तिलकाङ्कितार्धशशिलेशलालितै-
र्धृतमाल्यगन्धकचबन्धबन्धुरैः ॥

१८.१००

सुमनः शिलीमुखमहास्रविभ्रम-
स्मितबध्यमानयुवलोकमानसैः ।
नवनागवल्लिरसपूरितप्रभ-
द्विजवर्णकीर्णदशनांशुराजिभिः ॥

१८.१०१

तिलपुष्पकान्तिहरनासिकापुटै-
र्ललितभ्रुभिर्वलितलोचनोत्पलैः ।
स्नपितैरिव प्रचुरकान्तिवारिभि-
र्वदनैश्च भूषितमधीरचक्षुषाम् ॥

१८.१०२

रामश्च कंसमथनश्च मनोभवश्च
प्राप्तं चिराय विजयश्च विलोकयन्ती ।
केनापि पूर्णहृदयेन रसेन कुन्ती
प्रास्यन्दतेन्दुमणिरिन्दुकराहतेव ॥

॥ इति अष्टादशस्सर्गः ॥

Other texts to read

भट्टिकाव्यम् भट्टिः

श्रीमच्छंकरदिग्विजयः विद्यारण्यस्वामी

About

Sanskrit Sahitya is a free, open-access digital library of classical Sanskrit literature with AI-powered tools and translations.

Resources

Connect