त्वक्साररन्ध्रपरिपूरणलब्धगीति-
रस्मिन्नसौ मृदितपक्ष्मलरल्लकाङ्गः ।
कस्तूरिकामृगविमर्दसुगन्धिरेति
रागीव सक्तिमधिकां विषयेषु वायुः ॥

मल्लिनाथः त्वगिति ॥ अस्मिन्नद्रौ त्वचि सारो येषां ते त्वक्सारा वंशाः । `वंशे त्वक्सारकर्मारत्वचिसारतृणध्वजाः` इत्यमरः । तेषां रन्ध्राणि तेषां परिपूरणेन ध्मापनेन लब्धा गीतिर्गानसुखं येन सः । मृदितानि संमृष्टानि पक्ष्मलानि लोमशानि रल्लकानां कम्बलमृगाणां, कम्बलानां वाङ्गानि शरीराणि येन सः । `रल्लकः कम्बलमृगे कम्बले परिकीर्तितः` इति वैजयन्ती । एतेन स्पर्शसुखमुक्तम् । कस्तूरिकामृगाणां विमर्दैन संघर्षेण सुगन्धिः शोभनगन्धः । यद्यपि गन्धस्यत्वे तदेकान्तग्रहणं कर्तव्यमित्युक्तम् , तथापि `निरङ्कुशाः कवयः` इत्यपर्यनुयोगः । असावेवंभूतो वायू रागीव कामीव विषयेषु प्रदेशेषु च । `विषयः स्यादिन्द्रियार्थे देशे जनपदेऽपि च` इति विश्वः । अधिकां सक्तिं व्यासक्तिमेति गच्छति

छन्दः वसन्ततिलका [१४: तभजजगग]

छन्दोविश्लेषणम्

१	२	३	४	५	६	७	८	९	१०	११	१२	१३	१४
त्व	क्सा	र	र	न्ध्र	प	रि	पू	र	ण	ल	ब्ध	गी	ति
र	स्मि	न्न	सौ	मृ	दि	त	प	क्ष्म	ल	र	ल्ल	का	ङ्गः
क	स्तू	रि	का	मृ	ग	वि	म	र्द	सु	ग	न्धि	रे	ति
रा	गी	व	स	क्ति	म	धि	कां	वि	ष	ये	षु	वा	युः
त			भ			ज			ज			ग	ग

Other texts to read

महाभारतम् वेदव्यासः

रामायणम् वाल्मीकिः

About

Resources

Connect