उच्चैमहारजतराजिविराजितासौ
दुर्वर्णभित्तिरिह सान्द्रसुधासवर्णा ।
अभ्येति भस्मपरिपाण्डुरितस्मरारे-
रुद्वह्निलोचनललामललाटलीलाम् ॥

मल्लिनाथः उच्चैरिति ॥ इहाद्रौ सान्द्रया सुधया लेपविशेषेणामृतेन वा सवर्णा समानवर्णा । `ज्योतिर्जनपद-` (अष्टाध्यायी ६.३.८५ ) इत्यादिना समानस्य सादेशः । `लेपभेदेऽमृते सुधा` इति वैजयन्ती । महारजतराजिविराजिता काञ्चनरेखाशोभिता असौ पुरोवर्तिनी उच्चैरुन्नता दुर्वर्णभित्ती रजतभित्तिः । `महारजतकाञ्चने` इति,`दुर्वणं रजतं रूप्यम्` इति चामरः । भस्मना परिपाण्डुरितस्य स्मरारेरुद्वह्नि उद्गतार्चिलोचनमेव ललामं भूषणं यस्य तस्य ललाटस्य लीलां शोभामभ्येति भजतीति निदर्शनालंकारः । `ललामं पुच्छपुण्ड्राश्वभूषाप्राधान्यकेतुषु` इत्यमरः

छन्दः वसन्ततिलका [१४: तभजजगग]

छन्दोविश्लेषणम्

१	२	३	४	५	६	७	८	९	१०	११	१२	१३	१४
उ	च्चै	म	हा	र	ज	त	रा	जि	वि	रा	जि	ता	सौ
दु	र्व	र्ण	भि	त्ति	रि	ह	सा	न्द्र	सु	धा	स	व	र्णा
अ	भ्ये	ति	भ	स्म	प	रि	पा	ण्डु	रि	त	स्म	रा	रे
रु	द्व	ह्नि	लो	च	न	ल	ला	म	ल	ला	ट	ली	लाम्
त			भ			ज			ज			ग	ग

Other texts to read

किरातार्जुनीयम् भारविः

भट्टिकाव्यम् भट्टिः

About

Resources

Connect