प्रजा इवाङ्गादरविन्दनाभेः
शंभोर्जटाजूटतटादिवापः ।
मुखादिवाथ श्रुतयो विधातुः
पुरान्निरीयुर्मुरजिद्ध्वजिन्यः ॥

मल्लिनाथः प्रजा इति ॥ अरविन्दनाभेर्विष्णोरङ्गात् प्रजा इव । `यतो वा इमानि भूतानि जायन्ते` इति श्रुतेरिति भावः । शंभोर्जटाजूटतटात् आप इव गङ्गाजलानीव विधातुर्मुखात् श्रुतय इव मुरजितो हरेः ध्वजिन्यः सेनाः पुरान्निरीयुर्निर्गताः । मालोपमेयम्

छन्दः उपजातिः [११]

छन्दोविश्लेषणम्