स्वर्गेवासं कारयन्त्या चिराय
प्रत्यग्रत्वं प्रत्यहं धारयन्त्या ।
कश्चिद्भेजे दिव्यनार्या परस्मिं-
ल्लोके लोकं प्रीणयन्त्येह कीर्त्या ॥

मल्लिनाथः स्वर्गवासमिति ॥ कश्चिद्वीरश्चिराय चिरकालं स्वर्गेवासम् । `शयवासवासिष्वकालात्` (अष्टाध्यायी ६.३.१८ ) इति विकल्पादलुक् । कारयन्त्या अनुभावयन्त्या अहन्यहनि प्रत्यहम् । `नपुंसकादन्यतरस्याम्` (अष्टाध्यायी ५.४.१०९ ) इत्यव्ययीभावे समासान्तष्टच्प्रत्ययः । `अव्ययानां भमात्रे टिलोपः` (वा०) इत्युक्तम् । प्रत्यग्रत्वं नूतनत्वं धारयन्त्या । परप्रेमास्पदत्वादिति भावः । लोकं प्रीणयन्त्या अद्भुतत्वं प्रापयन्त्या । प्रीञो ण्यन्ताल्लटः शतरि ङीप् `धूञ्प्रीञोर्नुग्वक्तव्यः` (वा०) इति नुगागमः । दिव्यनार्या, परस्मिंल्लोके इह लोके कीर्त्या च भेजे प्राप्तः । भजेः कर्मणि लिट् । रणमरणाल्लोकद्वयमपि जिगायेत्यर्थः । अत्र दिव्याङ्गनाकीर्त्योः प्रकृतयोरेव तुल्यधमसंबन्धात्केवलप्रकृतास्पदा तुल्ययोगिता

छन्दः शालिनी [११: मततगग]

छन्दोविश्लेषणम्

१	२	३	४	५	६	७	८	९	१०	११
स्व	र्गे	वा	सं	का	र	य	न्त्या	चि	रा	य
प्र	त्य	ग्र	त्वं	प्र	त्य	हं	धा	र	य	न्त्या
क	श्चि	द्भे	जे	दि	व्य	ना	र्या	प	र	स्मिं
ल्लो	के	लो	कं	प्री	ण	य	न्त्ये	ह	की	र्त्या
म			त			त			ग	ग

Other texts to read

किरातार्जुनीयम् भारविः

महाभारतम् वेदव्यासः

About

Resources

Connect