पयोमुचामभिपततां दिवि द्रुतं
विपर्ययः परित इवातपस्य सः ।
समक्रमः समविषमेष्वथ क्षणा-
त्क्षमातलं बलजलराशिरानशे ॥

मल्लिनाथः पयोमुचामिति ॥ अथासुरसेनादर्शनानन्तरं समविषमेषु निम्नोन्नतेषु समक्रमस्तुल्यसंचारः बलजलराशिः सैन्यसागरः दिवि व्योम्नि द्रुतमभिपततामभिधावतां पयोमुचां संबन्धी आतपस्य विपर्ययः छायेव परितः क्षणारक्षमातलं भूतलमानशे । `अशू व्याप्तौ`, `अत आदेः` (७/४/७०) इत्यभ्यासदीर्घः । `अश्नोतेश्च` (७/४/७२) इति नुमागमः । उपमालंकारः

छन्दः रुचिरा [१३: जभसजग]

छन्दोविश्लेषणम्