मल्लिनाथः
इत्थमिति ॥ इत्थमत्र क्रतौ विततक्रमे विस्तृतानुष्ठाने सति अथानन्तरं धर्माज्जन्म यस्य तेन धर्मजन्मना धर्मात्मजेन ।जन्माद्युत्तरपदो बहुव्रीहिर्व्यधिकरण` इति वामनः । धर्मं वीक्ष्य । धर्मशास्त्रमनुस्मृत्येत्यर्थः । अर्घदानं पूजादानमनु । सदस्यपूजामुद्दिश्येत्यर्थः । `सदस्यं सप्तदशं कौषीतकिनः समामनन्ति` इति शास्त्रात् । `मूल्ये पूजाविधावर्घः` इत्यमरः । चोदितः कस्मै देयमिदमिति पृष्टः शन्तनोः सुतो भीष्मः । सभ्यं सभायां साधु । `सभाया यः` (अष्टाध्यायी १.४.१०५ ) इति यप्रत्ययः । वचो वाक्यमभ्यधिताभिहितवान् । दधातेर्लुङि तङि `स्थाध्वोरिच्च` (अष्टाध्यायी १.२.१७ ) इति सिचः कित्वे `ह्रस्वादङ्गात्` (अष्टाध्यायी ८.२.२७ ) इति सकारलोपः । वृत्त्यनुप्रासोऽलङ्कारः
छन्दः
रथोद्धता [११: रनरलग]
छन्दोविश्लेषणम्
| १ | २ | ३ | ४ | ५ | ६ | ७ | ८ | ९ | १० | ११ |
|---|---|---|---|---|---|---|---|---|---|---|
| इ | त्थ | म | त्र | वि | त | त | क्र | मे | क्र | तौ |
| वी | क्ष्य | ध | र्म | म | थ | घ | र्म | ज | न्म | ना |
| अ | र्घ | दा | न | म | नु | चो | दि | तो | व | चः |
| स | भ्य | म | भ्य | धि | त | श | न्त | नोः | सु | तः |
| र | न | र | ल | ग | ||||||
Other texts to read
About
Sanskrit Sahitya is a free, open-access digital library of classical Sanskrit literature with AI-powered tools and translations.