सितरुचिशयनीये नक्तमेकान्तमुक्तं
दिनकरकरसङ्गव्यक्तकौसुम्भकान्ति ।
निजमिति रतिबन्धोर्जानतीमुत्तरीयं
परिहसति सखी स्त्रीमाददानां दिनादौ ॥

मल्लिनाथः सितेति ॥ नक्तं रात्रौ शयनीये तल्पे । एकान्तमुक्तमत्यन्तत्यक्तं सितरुचि शुभ्रवर्णम् । किंतु दिनादौ प्रभाते दिनकरकरसङ्गेनार्कांशुव्यतिकरेण व्यक्ता कौसुम्भी कुसुम्भस्य रागद्रव्यस्य संबन्धिनी कान्तिर्यस्य तत्तथा भासमानं रतिबन्धोः प्रियस्योत्तरीयं निजमात्मीयमिति जानतीम् । अत एवाददानां स्त्रीनायिकाम् । `वाम्शसोः` (अष्टाध्यायी ६.४.८० ) इतीयङभावपक्षे `अमि पूर्वः` (अष्टाध्यायी ६.१.१०७ ) इति पूर्वरूपम् । सखी परिहसति । अत्राकौसुम्भे कौसुम्भभ्रमात् सादृश्यनिबन्धनाद्भ्रान्तिमदलंकारः

छन्दः मालिनी [१५: ननमयय]

छन्दोविश्लेषणम्

१	२	३	४	५	६	७	८	९	१०	११	१२	१३	१४	१५
सि	त	रु	चि	श	य	नी	ये	न	क्त	मे	का	न्त	मु	क्तं
दि	न	क	र	क	र	स	ङ्ग	व्य	क्त	कौ	सु	म्भ	का	न्ति
नि	ज	मि	ति	र	ति	ब	न्धो	र्जा	न	ती	मु	त्त	री	यं
प	रि	ह	स	ति	स	खी	स्त्री	मा	द	दा	नां	दि	ना	दौ
न			न			म			य			य

Other texts to read

श्रीमद्भगवद्गीता

रघुवंशम् कालिदासः

About

Resources

Connect