यो बाह्यः स खलु जलैर्निरासि रागो
यश्चित्ते स तु तदवस्थ एव तेषाम् ।
धीराणां व्रजति हि सर्व एव नान्तः-
पातित्वादभिभवनीयतां परस्य ॥

मल्लिनाथः य इति ॥ तेषां यदूनां बहिर्भवो बाह्यः । `बहिषष्टिलोपो यञ्च` (वा०) इति वचनात् यञ् प्रत्ययः । यो रागोऽङ्गरागः स रागो जलैस्तोयैः, जडैश्च निरासि निरस्तः खलु । अस्यतेः कर्मणि लुङ् । चित्ते यो रागः स तु सैवावस्था यस्य स तदवस्थ एव । न निरस्त इत्यर्थः । अत्र रागयोरभेदाध्यवसायादतिशयोक्तिः । तथा हि सर्वोऽपि धीराणां महतामन्तःपातित्वात् । अन्तर्गतत्वादेवेति यावत् । परस्याभिभवनीयतां न व्रजति । अन्यथा व्रजत्येवेत्यर्थः । पूर्ववदलंकारः

छन्दः प्रहर्षिणी [१३: मनजरग]

छन्दोविश्लेषणम्

१	२	३	४	५	६	७	८	९	१०	११	१२	१३
यो	बा	ह्यः	स	ख	लु	ज	लै	र्नि	रा	सि	रा	गो
य	श्चि	त्ते	स	तु	त	द	व	स्थ	ए	व	ते	षाम्
धी	रा	णां	व्र	ज	ति	हि	स	र्व	ए	व	ना	न्तः
पा	ति	त्वा	द	भि	भ	व	नी	य	तां	प	र	स्य
म			न			ज			र			ग

Other texts to read

योगवासिष्ठम् वाल्मीकिः

भट्टिकाव्यम् भट्टिः

About

Resources

Connect