नादातुमन्यकरिमुक्तमदाम्बुतिक्तं
धूताङ्कुशेन न विहातुमपीच्छताम्भः ।
रुद्धे गजेन सरितः सरुषावतारे
रिक्तोदपात्रकरमास्त चिरं जनौघः ॥

मल्लिनाथः नेति ॥ अन्यकरिणा प्रतिगजेन मुक्तेन मदाम्बुना तिक्तं सुरभि । `कटुतिक्तकषायास्तु सौरभ्येऽपि प्रकीर्तिताः` इति केशवः । अम्भ आदातुं ग्रहीतुं नेच्छता विहातुं त्यक्तुमपि नेच्छता अनिच्छता । क्रोधपिपासाभ्यामिति भावः । धूताङ्कुशेन सरुषा सक्रोधेन गजेन नगसरितोऽवतारे तीर्थे रुद्धे सति जनौघः रिक्तान्युदपात्राणि येषु ते करा यस्मिंस्तद्यथा तथा चिरमास्त अतिष्ठत् । `आस उपवेशने` लङ्। `एकहलादौ पूरयितव्येऽन्यतरस्याम्` (अष्टाध्यायी ६.३.५९ ) इत्युदकशब्दस्योदादेशः

छन्दः वसन्ततिलका [१४: तभजजगग]

छन्दोविश्लेषणम्

१	२	३	४	५	६	७	८	९	१०	११	१२	१३	१४
ना	दा	तु	म	न्य	क	रि	मु	क्त	म	दा	म्बु	ति	क्तं
धू	ता	ङ्कु	शे	न	न	वि	हा	तु	म	पी	च्छ	ता	म्भः
रु	द्धे	ग	जे	न	स	रि	तः	स	रु	षा	व	ता	रे
रि	क्तो	द	पा	त्र	क	र	मा	स्त	चि	रं	ज	नौ	घः
त			भ			ज			ज			ग	ग

Other texts to read

कुमारसंभवम् कालिदासः

श्रीमद्भगवद्गीता

About

Resources

Connect