आस्थद्दृष्टेराच्छदं च प्रमत्तो
यन्ता यातुः प्रत्यरीभं द्विपस्य ।
भग्नस्योच्चैर्बर्हभारेण शङ्को-
रवव्राते वीक्षणे च क्षणेन ॥

मल्लिनाथः आस्थदिति ॥ यन्ता प्रमत्तः सन् प्रत्यरीभमरिगजं प्रति । आभिमुख्येऽव्ययीभावः । यातुर्गन्तुः । यातेस्तृच् । द्विपस्य दृष्टेराच्छदमावरणम् । पुंसि संज्ञायां घः । आस्थन्निरस्तवान् । `अस्यतिवक्तिख्यातिभ्योऽङ्` (अष्टाध्यायी ३.१.५२ ) इति च्लेरङादेशः `अस्यतेस्थुक्` (अष्टाध्यायी ७.४.१७ ) इति थुगागमः । मग्नस्य मुखनिमग्नस्य शङ्कोः शल्यायुधस्य । `वा पुंसि शल्यं शङ्कर्ना इत्यमरः । उच्चैर्बर्हभारेण पिच्छपटलेन वीक्षणे चक्षुषी क्षणेनावव्राते आवृते । वृणोतेः कर्मणि लिट् । अन्योन्यसमुच्चयचकाराभ्यामावरणनिरासे पुनरावरणयोरेककाले संबन्धोक्तेरतिशयोक्तिः

छन्दः उपजातिः [११]

छन्दोविश्लेषणम्

१	२	३	४	५	६	७	८	९	१०	११
आ	स्थ	द्दृ	ष्टे	रा	च्छ	दं	च	प्र	म	त्तो
य	न्ता	या	तुः	प्र	त्य	री	भं	द्वि	प	स्य
भ	ग्न	स्यो	च्चै	र्ब	र्ह	भा	रे	ण	श	ङ्को
र	व	व्रा	ते	वी	क्ष	णे	च	क्ष	णे	न

Other texts to read

योगवासिष्ठम् वाल्मीकिः

रामायणम् वाल्मीकिः

About

Resources

Connect