मल्लिनाथः
नेति ॥ अर्थकाम्यता अर्थमात्मन इच्छता धनार्थिना । `काम्यच्च` (अष्टाध्यायी ३.१.९ ) इति काम्यच्प्रत्यये सनाद्यन्तत्वेन धातुत्वाल्लटि शत्रादेशः । तत्सद उपेयुषा प्राप्तवता पुरुषेणानवाप्तवसुना अलब्धधनेन न प्रत्यगामि न प्रत्यावर्ति । रोगिणोपेयुषा अचिकित्सितगदेनाशमितरोगेण । `रोगव्याधिगदामयाः` इत्यमरः । न प्रत्यगामि । अशितुं भोक्तुं इच्छता उपेयुषा अनाशुषा च अनशितेन । अभुक्तवतेत्यर्थः। `उपेयिवाननाश्वाननूचानश्च` (अष्टाध्यायी ३.२.१०९ ) इति क्वसुप्रत्ययान्तो निपातितः । न प्रत्यगामि किंतु सर्वेणापि पूर्णकामेनैव प्रत्यगामीत्यर्थः । गमेर्भावे लुङ् । अत्रार्थिरोगिक्षुधितानां प्रकृतानामेव पूर्णकामत्वसाम्याद्गम्यौपम्यत्वात्केवलप्रकृतविषया तुल्ययोगिता । तथा च यो यत्काम आगतः स तत्सर्वमेवास्मादलभतेति व्यज्यते
छन्दः
रथोद्धता [११: रनरलग]
छन्दोविश्लेषणम्
| १ | २ | ३ | ४ | ५ | ६ | ७ | ८ | ९ | १० | ११ |
|---|---|---|---|---|---|---|---|---|---|---|
| ना | न | वा | प्त | व | सु | ना | र्ऽथ | का | म्य | ता |
| ना | चि | कि | त्सि | त | ग | दे | न | रो | गि | णा |
| इ | च्छ | ता | शि | तु | म | ना | शु | षा | न | च |
| प्र | त्य | गा | मि | त | दु | पे | यु | षा | स | दः |
| र | न | र | ल | ग | ||||||
Other texts to read
About
Sanskrit Sahitya is a free, open-access digital library of classical Sanskrit literature with AI-powered tools and translations.