तृणवाञ्छया मुहुरवाञ्चितानना-
न्निचयेषु यत्र हरिताश्मवेश्मनाम् ।
रसनाग्रलग्नकिरणाङ्कुराञ्जनो
हरिणान्गृहीतकवलानिवैक्षत ॥

मल्लिनाथः तृणेति ॥ यत्र सभायां हरिताश्मनां मरकतमणीनां गृहाणाम् । `गारुत्मतं मरकतमश्मगर्भो हरिन्मणिः` इत्यमरः । निचयेषु सङ्घेषु तृणवाञ्छया तृणाशया मुहुरवाञ्चिताननान्नमितमुखान् अत एव रसनाग्रेषु लग्नाः किरणा अङ्कुरा इव येषां ते तान् । अत एव गृहीतकवलानुपात्ततृणग्रासानिव स्थितान् हरिणान् जन ऐक्षत ईक्षितवान् । ईक्षतेर्लङि `आडजादीनाम्` (६|४|७२) इत्याट् `आटश्च` (६।१|९०) इति वृद्धिः । अत्र तृणवाञ्छयेति हरिणानां मरकतेषु तृणभ्रान्तेर्भ्रान्तिमदलंकारः । तन्मूला चेयं गृहीतकवलत्वोत्प्रेक्षेति संकरः

छन्दः मञ्जुभाषिणी [१३: सजसजग]

छन्दोविश्लेषणम्

१	२	३	४	५	६	७	८	९	१०	११	१२	१३
तृ	ण	वा	ञ्छ	या	मु	हु	र	वा	ञ्चि	ता	न	ना
न्नि	च	ये	षु	य	त्र	ह	रि	ता	श्म	वे	श्म	नाम्
र	स	ना	ग्र	ल	ग्न	कि	र	णा	ङ्कु	रा	ञ्ज	नो
ह	रि	णा	न्गृ	ही	त	क	व	ला	नि	वै	क्ष	त
स			ज			स			ज			ग

Other texts to read

भट्टिकाव्यम् भट्टिः

योगवासिष्ठम् वाल्मीकिः

About

Resources

Connect