विशदाश्मकूटघटिताः क्षपाकृतः
क्षणदासु यत्र च रुचेकतां गताः ।
गृहपङ्क्तयश्चिरमतीयिरे जनै-
स्तमसीव हस्तपरिमर्शसूचिताः ॥

मल्लिनाथः विशदेति ॥ किंचेति चार्थः । यत्र सभायां विशदाश्मकूटघटिताः स्फटिकशिलासंघातनिर्मिता अत एव क्षणदासु निशासु क्षपाकृतो निशाकरस्य रुचा चन्द्रिकयैकतां सावर्ण्यादभेदं गताः अत एव तमसीव हस्तपरिमर्शसूचिताः। पाणिस्पर्शैकगम्या इत्यर्थः । गृहपङ्क्तयो जनैश्चिरमतीयिरेऽतिक्रान्ताः। पुरोगतान्यपि स्फटिकभवनानि चन्द्रिकाभ्रमादतीत्य गत्वा पश्चात्करपरामर्शैः कथंचित्प्राप्यन्त इत्यर्थः । अत्र प्रकृतानां स्फटिकवेश्मनां गुणसाम्यादप्रस्तुतचन्द्रिकैक्योक्त्या सामान्यालंकारः। `सामान्यं गुणसाम्येन यत्र वस्त्वन्तरैकता` इति लक्षणात्

छन्दः मञ्जुभाषिणी [१३: सजसजग]

छन्दोविश्लेषणम्

१	२	३	४	५	६	७	८	९	१०	११	१२	१३
वि	श	दा	श्म	कू	ट	घ	टि	ताः	क्ष	पा	कृ	तः
क्ष	ण	दा	सु	य	त्र	च	रु	चे	क	तां	ग	ताः
गृ	ह	प	ङ्क्त	य	श्चि	र	म	ती	यि	रे	ज	नै
स्त	म	सी	व	ह	स्त	प	रि	म	र्श	सू	चि	ताः
स			ज			स			ज			ग

Other texts to read

श्रीमद्भगवद्गीता

रघुवंशम् कालिदासः

About

Resources

Connect