३.४९
हरिर्यथैकः पुरुषोत्तमः स्मृतो महेश्वरस्त्त्र्यम्बक एव नापरः ।
तथा विदुर्मां मुनयः शतक्रतुं द्वितीयगामी न हि शब्द एष नः ॥
सञ्जीविनीटीका (मल्लिनाथः) हरिरिति॥ पुरुषेषूत्तम इति सप्तमीसमासः। न निर्धारणे (अष्टाध्यायी २.२.५० ) इति षष्ठीसमासनिषेधात्। कर्मधारये तु सन्महत्परमोत्तमोत्कृष्टाः पूज्यमानैः इत्युत्तमपुरुष इति स्यात्। यथा ह्ररिर्विष्णुरेक एव पुरुषोत्तमः स्मृतः। यथा च त्र्यम्बकः शिव एव महेश्वरः स्मृतः। नापरोऽपरः पुमान्न। तथा मां मुनयः शतक्रतुं विदुर्विदन्ति। विदो लटो वा (अष्टाध्यायी ३.४.८३ ) इति झेर्जुसादेशः। नोऽस्माकम्। हरिहरयोर्मम चेत्यर्थः। एष त्रितयोऽपि शब्दो द्वितीयगामी न हि। द्वितीयाप्रकरणे नमिगम्यादीनामुपसंख्यानात्समासः ॥
छन्दः वंशस्थम् [१२: जतजर]
छन्दोविश्लेषणम्
१२३४५६७८९१०१११२
ह रिर्य थै कःपुरु षोत्त मःस्मृ तो
म हेश्व र स्त्त्र्यम्बक एव नाप रः
त थावि दु र्मांमुन यःश तक्र तुं
द्वि तीय गा मीनहि शब्द एष नः
जतजर
Please update Chrome!

Your chrome browser is running an old version, due to which SanskritSahitya.org is unable to load properly.

Please update your Chrome browser and then reinstall the app by visiting the website on Chrome.